Plattdeutsches Theater mit dem MTV Ramelsloh im Landkreis Harburg

„Glück un Pech bi‘n Lotto“

Wonehm dat Stück vun hannelt

„Arven un nich starven“  

Niederdeutsches Lustspiel in drei Akten von Wolfgang Binder

Speelst du ok Lotto? Hest al mal wat gewunnen? 3 Richtige? 10 Euro 40? Womöglich noch mit Tosatzzahl? 23 Euro 70? Na ja, een freit sick ja ok öber Lüttgeld, aber de grote Wende in’n Leben is dat nich. Oder hest du al mal den Jackpot knackt, un – seggt wi mal – 6,5 Millionen afsahnt? Dat weer doch mal wat! Dor künnst du een ganz annert Leben anfangen! Hest al mal överleggt, wat du mit so veel Geld anfangen würrst? Een Weltreis? Een Villa? Een grot Auto oder een Luxusjacht?

Bruukst nich lang nahtodenken, dor warrt woll doch nix vun warrn. Jedenfalls is dat tämlich unwahrscheinlich. Mennicheen seggt ja ok, wat een bi’n Lotto insett, dat is een Extra-Stüer för Lüüd, de de Wahrscheinlichkeitsrechnung nich begrepen hebbt. Dat best is denn ja woll, du sporst dat Geld un höllst op mit Lotto. Heff ik ok so maakt. Man wenn nu de Zahlen, de ik jümmers tippt heff, würklich mal kommt, denn würr ik mi aber doch bannig argern.

Worüm vertell ik dat? Nu – in uns Theaterstück geiht dat üm Lotto. Horst-Dieter un Franziska Schmelzer hebbt den Jackpott knackt un een Millionengewinn insackt. Aber jeder för sick, un keener weiht vun den annern sien Gewinn wat af. Un schall dat ok nich weten. Dor kann een sick nu vörstellen, dat se beid mit düsse Heimlichdauerei in een bannige Bredouille kommt. Wat schass du dien Frau oder dien Kerl verkloren wo du mit’n Mal to soveel Geld kummst. Kannst ja nich seggen, du harrst een Bank öberfallen oder du harrst dat op de Straat funnen. So kommt se denn ok op de blöde Idee, to seggen, sei harrn dat arvt. Aber för dat Arven mutt ja eerstmal eener starben.  Jü markt al, dör düsse Leigerei warrt de Schwierigkeiten nich lütter – nee, se warrt jümmer grötter. Kerstin, de Dochter vun de beiden warrt in de Intrigen mit inspannt und Bernd Kraus, de Naber un Fründ vun Horst-Dieter ok. Wat Anne, de Swester vun Franziska un Ulrich, Horst-Dieter sien Broder dor nu mit to dauhn hebbt, dat will ik jo leeber nich verraden. Dat warrt ji bi’t Tokieken al gewohr warrn. Bannig veel Dörennanner un verdreihte Situatschonen sünd jedenfalls aftoseihn. Ji warrt woll allerhand to Lachen kriegen un ok to weten kriegen wokein nu starven mutt – oder ok nich. Also – veel Vergnögen!

Otto Cordes

Spielzeiten:

22.04.2022 – 20 Uhr

23.04.2022 – 19:30 Uhr

06.05.2022 – 20 Uhr

07.05.2022 – 19:30 Uhr

08.05.2022 – 16:30 Uhr

Katenvorverkauf:

Samstag 02.04.2022 Sportheim Ohlendorfer Str. 17, 21220 Seevetal

Ab Montag 04.04.2022 Teeinsel (Post), Osterwald 1-3, 21220 Seevetal